Novas BNG Concello Porto do Son

QUEREMOS GALEGO!

Mon, 14 May 2012 18:23:44 GMT

Porto do Son, 14 de maio 2012.- Manifestación nacional pola lingua que nos une. Paremos os ataques contra o Galego. 17 de maio de 2012, ás 12 horas, na Alameda de Santiago de Compostela.

Plan de axuste innecesario.

Mon, 14 May 2012 18:39:44 GMT

Porto do Son, 11 de maio 2012.- Diante do pleno extraordinario da corporación que se vai a celebrar o vindeiro luns, cun único punto na orde do día que é a concertación dunha operación de crédito a longo prazo para o financiamento das obrigas de pagamento a provedores, chamado Plan de Axuste, o BNG do Son manifesta:

Este préstamo era innecesario solicitalo posto que, coa política económica que practicamos no ano e medio que estivemos no goberno, a situación económica e os pagamentos a provedores de anos anteriores estaban encamiñados para saldar, na súa totalidade, as débedas que herdamos dos anteriores gobernos municipais.

Cando o BNG chegou ao Goberno municipal a débeda deste concello con provedores ascendía a 1.745.531,29 euros e o remanente de tesourería correspondente á liquidación da conta do ano 2009 era de pouco máis de 600.000 euros, polo que o defase real das contas do PP era de máis de -1.100.000 euros.

Cando saímos do goberno a débeda con provedores ascendía a 888.992,27 euros e deixamos un remanente de tesourería correspondente á liquidación da conta do ano 2010 de 876.845,44 euros cos que saldariamos o total da débeda herdada. O desfase real das contas do goberno participado polo BNG foi de -12.000 euros, o que amosa ben ás claras a diferenza da nosa xestión económica coa do goberno do PP.

O actual goberno municipal rexeitou unha moción presentada polo BNG coa que solicitabamos que o remanente que deixamos se destinara na súa totalidade a saldar toda a débeda. Diante desta proposta o goberno do PP prefireu gastar os cartos do remanente que deixamos e agora ten que acudir a un crédito para facer o que nós lle propuxemos no seu día e que, de aceptala, non suporía ningún custo adicional para os nosos veciños e veciñas.

Neste momento o goberno vai solicitar un crédito de case 600.000 euros, a dez anos e cuns intereses que estimamos arredor do 6-7%, que suporán que teremos que devolverlle ao banco unha cantidade moi importante en intereses, preto dos 300.000 euros. Todo isto cando a banca española acaba de recibir máis de 100.000 millóns de euros de liquidez do BCE ao 1%, e eles poderán prestar aos concellos a máis dun 6%. Esta diferenza no custo do financiamento será pagada a escote polos nosos veciños e veciñas porque o concello fai un plan de axuste no que se contempla que esta operación de crédito vaise financiar, únicamente, coa suba de impostos (IBI urbana e rústica, auga, lixo ...) e coa creación de novos (movida urbana...).

Só cos intereses dun crédito innecesario, o goberno do PP, podería realizar moitas obras necesarias e non tería porque crear novas taxas e subirlle os impostos aos nosos veciños e veciñas. Por todo isto o BNG está en contra desta proposta do goberno municipal.

O BNG do Son súmase á Plataforma Galega en Defensa do Ensino Público.

Mon, 07 May 2012 07:35:19 GMT

Porto do Son, 4 de maio 2012.- O 27 de abril presentouse en Santiago a Plataforma Galega en Defensa do Ensino Público, constituída o pasado día 25 con representantes da comunidade educativa galega, pais e nais, profesorado e alumnado, a través de diferentes entidades (organización sindicais do ensino, ANPAS, movementos de renovación pedagóxica, organización estudantís, partidos políticos …) co obxectivo de manifestar o rexeitamento da comunidade educativa galega ao Real Decreto-Lei 14/2012, publicado polo goberno do Estado, esixir da Consellaría de Educación que non aplique en Galiza ningún dos recortes contidos no RD Lei e que o recorra por invadir as competencias que en materia educativa ten a Xunta de Galiza.

No día de hoxe, o BNG de Porto do Son fixo a súa adhesión á plataforma, sumándose deste xeito a todas as mobilizacións propostas. A primeira acción será unha concentración comarcal o vindeiro martes, 8 de maio, ás 20.00 horas diante da casa do concello de Ribeira. Dende o BNG do Son facemos un chamamento á cidadanía do noso concello para que amosen o seu apoio á plataforma e asistan á concentración.

Para máis información da plataforma pinchade nesta ligazón

Parabéns polo 1º aniversario da páxina web de AVS.

Mon, 30 Apr 2012 17:44:12 GMT

Porto do Son, 30 de abril 2012.- Con motivo do 1º aniversario da páxina web de AVS e recoñecendo a transparencia nas súas publicacións, queremos dar a coñecer os datos que non aparecen nesa páxina, para que cada quen saque as súas conclusións.

O goberno do PP na Xunta de Galiza exclúe a Porto do Son das axudas aos servizos sociais comunitarios.

Fri, 13 Apr 2012 14:49:41 GMT

Porto do Son, 13 de abril 2012.- O BNG de Porto do Son vén de presentar no rexistro do Concello unha moción, para ser debatida no vindeiro pleno ordinario do mes de maio, na que se solicita á Corporación a adopción dun acordo para instar á Xunta de Galiza que derrogue o decreto 99/2012, polo que se regulan os servizos sociais comunitarios e o seu financiamento, no que se establece que o Servizo de Axuda no Fogar é un servizo social comunitario básico de carácter público que debe ser garantido polos concellos, e tamén, regula o financiamento do conxunto dos servizos sociais comunitarios e concretamente no que se refire aos gastos derivados da prestación do Servizo de Axuda no Fogar Básico soamente financiará ás corporacións locais de 20.000 ou máis habitantes, polo que o noso concello ficará sen as devanditas axudas, que xa viña, ano tras ano, recortando o goberno do PP na Xunta.

Este decreto vén a corroborar que a Xunta do PP se desentende por completo dos servizos sociais comunitarios nos concellos de menos de 20.000 habitantes, en especial do Servizo de Axuda no Fogar Básico, o que obrigará no mellor dos casos ao noso concello a financiar este servizo e aos usuarios e usuarias a pagar máis nas súas aportacións como copago, ou no peor dos casos a que os servizos desaparezan e só se manteñan para as persoas dependentes coa prestación asignada no seu Plan Individual de Atención. A Xunta trasládalle ao noso concello unha competencia pero sen financiamento. A Xunta debe asumir as súas competencias e garantir uns servizos sociais comunitarios acorde coas necesidades da poboación, e garantir e xestionar un servizo público básico que debe chegar en igualdade de calidade e dereitos a todos os galegos e galegas independentemente do concello onde vivan, como acontece coa sanidade e co ensino. Se non se fai así as consecuencias van ser moi graves. En primeiro lugar para as persoas usuarias do servizo, en segundo lugar para as xa depauperadas arcas municipais e para os traballadores e traballadoras que realizan este servizo xa que perderán o seu emprego, pasando a incrementar a alta taxa de desemprego existente.

O decreto tamén establece unha nova regulación da participación económica das persoas usuarias no custe do Servizo de Axuda no Fogar que incrementa de xeito substancial en case todos os tramos de renda o copago a realizar.

Por todo isto, o BNG do Son defenderá esta moción para instar á Xunta de Galiza que manteña o financiamento dos gastos derivados da prestación do Servizo de Axuda no Fogar Básico no noso concello, que contribúa economicamente ao mantemento da totalidade dos servizos sociais comunitarios do concello, que non incremente a participación económica das persoas usuarias no custe do Servizo de Axuda no Fogar, e que derrogue este decreto e negocie outro no marco da FEGAMP.

O BNG do Son apoia a convocatoria de FOLGA XERAL en contra da reforma laboral do PP.

Wed, 28 Mar 2012 09:11:05 GMT

Porto do Son, 28 de marzo 2012.- O BNG do Son quere amosar públicamente o seu rexeitamento á reforma laboral aprobada polo goberno central do PP e apoia a convocatoria de FOLGA XERAL feita polo sindicalismo nacionalista, polos dereitos laborais e sociais e na defensa da economía produtiva e fronte á especulación. Queremos, tamén, facer un chamamento á cidadanía para que apoien a convocatoria e asistan á manifestación convocada pola CIG que sairá ás 11:45 horas da Praza do Peixe de Ribeira.

O BNG presenta dúas iniciativas no Concello do Son.

Wed, 28 Mar 2012 08:50:05 GMT

Porto do Son, 28 de marzo 2012.- O BNG vén de presentar no rexistro do concello unha moción de rexeitamento da reforma laboral aprobada polo goberno central do PP, para ser debatida no vindeiro pleno ordinario. Tamén se rexistrou unha solicitude para que se amplíe a atención ao público dos técnicos de axuda para a redacción das alegacións ao PXOM, e que se habilite unha xornada de atención os venres, de 18:30 a 21:30 horas, para os veciños e veciñas que, polo seu horario laboral ou por residir fóra do concello durante a semana, non poden acudir no actual horario posto polo concello.

Para máis información poñemos á vosa disposición os documentos presentados no rexistro do concello.

Aprobación inicial do PXOM de Porto do Son.

Fri, 23 Mar 2012 08:51:29 GMT

Porto do Son, 23 de marzo 2012.- Na sesión plenaria do día 27 de febreiro de 2012 foi aprobado inicialmente o Plan Xeral de Ordenación Municipal do Concello de Porto do Son. O anuncio de dita aprobación saiu publicado no DOG nº 58, do 23 de marzo de 2012, polo que se abre o trámite de información pública durante o prazo de dous meses para o seu exame e formular as alegacións que se estimen oportunas. O prazo para a presentación de alegacións rematará o día 24 de maio de 2012.

O BNG do Son porá á disposición de todas aquelas persoas ou entidades os medios necesarios para clarificar as dúbidas que xurdan ao respecto e á hora de formular as alegacións. En breve iniciaranse visitas ás distintas parroquias. Os xoves de 20:00 a 22:00 horas estará aberta a sede local do BNG e tamén se pode contactar con nós por vía electrónica.

O documento completo do PXOM pódese consultar na seguinte ligazón.

Ademais, para maior axilidade poñemos á vosa disposición a posibilidade de descargar os planos de ordenación de cada unha das parroquias do concello.

Acto público sobre a reforma laboral do PP.

Mon, 19 Mar 2012 09:38:35 GMT

Porto do Son, 19 de marzo 2012.- O vindeiro sábado 24 de marzo terá lugar un acto público sobre a reforma laboral do PP na Alameda de Noia, fronte á Casa do Concello, ás 19:30 horas.

No acto intervirán a Responsábel Comarcal do BNG Muros-Noia, Ánxela Franco Pouso; o Secretario Comarcal da CIG, Xan García Suárez; e o Deputado do BNG no Parlamento Galego, Bieito Lobeira Domínguez.

O acto será para amosar o apoio do BNG á participación na Folga Xeral do 29 de marzo, convocada polo sindicalismo nacionalista, polos dereitos laborais e sociais e na defensa da economía produtiva e fronte á especulación.

8 de marzo, día internacional das mulleres. NON á reforma da Lei do Aborto!

Tue, 06 Mar 2012 09:08:41 GMT

Porto do Son, 6 de marzo 2012.- O 8 de marzo celébrase o día internacional das mulleres, motivo polo que o BNG do Son presentou unha moción no Pleno do día 27 de febreiro, na que se lle pedía ao Goberno do Estado o mantemento da lei de saúde sexual e reprodutiva e da interrupción voluntaria do embarazo que garante para as mulleres a libre decisión sobre a súa maternidade. Esta moción foi rexeitada con votos en contra do bipartito local PP-AVS e cos votos favorábeis do BNG e do PSOE, o que amosa a pouca sensibilidade e compromiso do goberno local coas mulleres do noso concello.

Podedes descargar o dítico editado polo BNG co motivo da celebración do día internacional das mulleres.

Renovación de cargos na organización do BNG.

Mon, 27 Feb 2012 16:08:03 GMT

Porto do Son, 27 de febreiro 2012.- O BNG vén de rematar o proceso de renovación dos seus cargos de organización estabelecido no calendario aprobado na XIII Asemblea Nacional.

O pasado 17 de febreiro saiu elexido o novo Consello Comarcal do BNG Muros-Noia, á fronte do que estarán Ánxela Franco Pouso, coma Responsábel Comarcal, e Xoan Xosé León Martínez coma Vice-responsábel Comarcal, quenes representarán á nosa comarca no Consello Nacional do BNG.

E, o pasado 25 de febreiro, resultou elixido Santiago Suárez Blanco coma Responsábel Local do BNG de Porto do Son.

Publicación das convocatorias de subvencións para o exercicio 2012 da Deputación da Coruña.

Thu, 23 Feb 2012 13:00:57 GMT

Porto do Son, 23 de febreiro 2012.- A Deputación da Coruña vén de publicar as convocatorias de subvencións para o exercicio 2012 destinadas ás asociacións e entidades locais.

Achegamos os enlaces sobre información relativa ás convocatorias de subvencións.

LUGAR E PRAZO DE PRESENTACIÓN DAS SOLICITUDES

No rexistro xeral da Deputación ou de xeito telemático a través da páxina web da Deputación da Coruña, www.dicoruna.es, o que producirá os seguintes efectos:

a) Só para solicitantes que dispoñan de sinatura electrónica:

A presentación telemática producirá plenos efectos xurídicos, sempre que a solicitude se envíe dentro do prazo establecido.

En calquera caso, rematado o prazo de presentación de solicitudes, a Deputación requirirá de oficio a documentación á que se refire o apartado 4 e que aínda non se presentase.

Prazo: rematará o 15 de marzo de 2012. No caso da presentación telemática con sinatura electrónica, o envío poderá realizarse en calquera momento, dentro do prazo, antes das 00.00 h do día 16 de marzo de 2012.

O BNG presenta CINCO mocións para debater no vindeiro pleno ordinario do mes de Marzo.

Fri, 17 Feb 2012 16:15:02 GMT

Porto do Son, 17 de febreiro 2012.- O BNG vén de presentar no rexistro do Concello cinco mocións para que sexan debatidas no vindeiro pleno ordinario do mes de Marzo.

- Moción contra a suba do imposto de bens inmóbeis (IBI) decidida polo Goberno do Estado, unha medida que obriga a un aumento impositivo que prexudicará á cidadanía, cun grave impacto nas economías domésticas e que invade as competencias municipais.

- Moción de apoio á iniciativa lexislativa popular para a defensa e promoción da sanidade pública en Galiza, que está a promover a Plataforma SOS Sanidade Pública, coa finalidade de deter a política de recortes e privatizacións da Sanidade Pública impulsada polo actual Goberno Galego e co fin de garantir o dereito constitucional á protección da saúde dos galegos e galegas.

- Moción contra a supresión das gardas de farmacia, debido a que o Parlamento Galego, cos únicos votos do PP, vén de modificar a Lei de Ordenación Farmaceútica que permite eliminar as gardas nocturnas das oficinas de farmacia en determinadas circunstancias; entre outras, cando non existe un Punto de Atención Continuada (PAC) no concello ao que dá servizo a farmacia, como no caso do noso concello.

- Moción para declarar o 24 de febreiro Día de Rosalía de Castro, coincidindo co día do seu nacemento, a difusión do coñecemento da súa obra é necesaria para as galegas e os galegos, en especial para as xeracións máis novas que colectivamente contribuímos a coeducar, sendo a súa palabra feita poesía ou prosa reflexiva un dos procedementos máis eficaces para fomentar o amor á nosa lingua e comprender a nosa identidade cultural.

- Moción polo 8 de marzo de 2012, Día Internacional das Mulleres, no que o BNG quere facer especial incidencia no retroceso democrático que supoñerá a anunciada derrogación da norma que actualmente regula a interrupción voluntaria do embarazo. Unha demanda de décadas das mulleres que se cumpriu hai escasos meses e que o Partido Popular anuncia que desmantelará como tantas outras políticas públicas de igualdade.

O BNG do Son amosa o seu pesar polo falecemento de Domingos Dosil.

Mon, 06 Feb 2012 16:26:14 GMT

Porto do Son, 6 de febreiro 2012.- Esta madrugada deixounos o compañeiro Domingos Dosil, ex-alcalde do BNG de Muros e ex-presidente de Cogami (Confederación Galega de Persoas con Discapacidade). Dende o BNG do Son queremos amosar o noso pesar polo seu falecemento aos seus familiares, amizades e a toda a familia nacionalista. Con Domingos vaise un traballador e un loitador incansábel. Grazas, polo teu labor e polo teu traballo a prol da nosa terra, compañeiro e amigo. Descanse en paz.

O BNG do Son comunica actualizacións nesta web.

Thu, 26 Jan 2012 12:27:55 GMT

Porto do Son, 26 de xaneiro 2012.- Dende que iniciamos a andaina desta páxina web estamos a pór á disposición da cidadanía, no apartado de DESCARGAS, as Actas das sesións plenarias e das xuntas de goberno local que se celebran no noso concello. A partires de hoxe tamén estará un enlace ás actas máis recentes nos TELETIPOS.

O BNG felicita o Nadal.

Tue, 20 Dec 2011 16:07:14 GMT

Porto do Son, 20 de decembro 2011.- Neste ano 2011 que está a piques de rematar, celebramos o 125 aniversario do nacemento de Castelao. É por iso que, dende o BNG de Porto do Son, quixemos facerlle unha homenaxe adicándolle a nosa felecitación de Nadal cunha frase do seu libro Sempre en Galiza que resume os nosos desexos para o vindeiro ano 2012.

Unha aperta moi grande para todas e todos e desexámosvos un Bo Nadal e Feliz Aninovo.

O BNG rexistra tres mocións para cebater no vindeiro pleno ordinario.

Fri, 16 Dec 2011 10:55:08 GMT

Porto do Son, 16 de decembro 2011.- O BNG vén de presentar no rexistro do concello tres mocións para que sexan debatidas no vindeiro pleno ordinario.

Diante desta situación de crise na que nos atopamos, os gobernos do Estado e da Xunta están a apertar, aínda máis, as xa débiles economías das familias aplicando medidas que axudan a empeorar a súa situación económica e o seu benestar social, polo que dende o BNG vemos necesario adoptar medidas urxentes para que esta situación non vaia a máis, por iso presentamos as seguintes mocións:

- Moción para o control das abusivas comisións bancarias.

- Moción sobre a derrogación da orde pola que se aproban os prezos medios no mercado de determinados inmóbeis rústicos e urbanos situados na Comunidade Autónoma de Galiza para os exercicios 2010 e 2011.

- Moción sobre a anulación da tarxeta sanitaria ás persoas desempregadas e persoas ser recursos económicos.

Mitin do BNG en Porto do Son.

Thu, 10 Nov 2011 11:56:28 GMT

Porto do Son, 10 de novembro 2011.- O vindeiro sábado, día 12 de novembro, ás 19.00 horas, terá lugar o Mitin de campaña electoral Xerais 2011en Porto do Son.

No acto intervirán a voceira municipal do BNG, Ánxela Franco Pouso, a candidata nº 6 pola Coruña, María Xosé Alfonso Torres, e a candidata nº 2 pola Coruña, Rosana Pérez Fernández.

O acto, debido a non dispór de un local público para a súa celebración, terá lugar no Bar Xavi, na rúa da Igrexa (estrada xeral) ao carón da Administración de Lotaría de Porto do Son.

Programa Electoral do BNG para as Eleccións Xerais 2011.

Tue, 08 Nov 2011 10:31:54 GMT

Porto do Son, 8 de novembro 2011.- O BNG de Porto do Son pón á disposición da cidadanía o programa electoral para as eleccións xerais do 20 de novembro 2011.

Acto público do BNG de cara ás vindeiras eleccións xerais.

Mon, 24 Oct 2011 09:25:59 GMT

Porto do Son, 22 de outubro 2011.- O BNG de Porto do Son quere convidar á cidadanía a participar no Acto Público de cara ás videiras eleccións xerais que terá lugar o luns, 24 de outubro, ás 20.30 horas, no Auditorio da Casa de Cultura de Muros.