O BNG solicita ante o Parlamento do Estado que teña en conta as alegacíons dos veciños e veciñas de Corme ao deslinde proposto por Costas
A inclusión na zona de servidume de solares e vivendas, afecta a máis de 300 veciños e lle impón importantes restricciónsFrancisco Jorquera advirte deste xeito ao Goberno Central do malestar xerado na veciñanza tras a reunión da xefa de Servizo de Deslinde da Demarcación de Costa de Galiza, o pasado 10 de decembro, “na que os veciños comprobaron que a proposta presentada polo organismo contiña importantes modificacións que consideran xeran discriminacións inxustificábeis”.
Costas inclúe na zona de servidume a zonas do casco urbano
Así, o deputado do BNG lembra que a liña de servidume proposta por Costas “abrangue a todas as vivendas e solares situados entre o paseo marítimo e a rúa principal da vila, non toca a urbanización que se está a levantar xunto á praia de Osmo”.
Esta inclusión na zona de servidume, que afecta a máis de 300 veciños, supón importantes restricións, como a imposibilidade de realizar novas edificacións e ampliar o volume das xa existentes, ou que os solares só se poderán edificar se teñen aprobados os estudos de detalle, aínda que o solar colindante si estea edificado.
Neste sentido, o deputado do BNG pregúntalle ao Goberno que explique as contradicións e discriminacións que denuncian os veciños de Corme na liña de deslinde do dominio público marítimo terrestre propostas por Costas.
A este respeito, Jorquera pregúntalle ao Executivo se non considera “razoábel” as alegacións presentada pola asociación de veciños Eduardo Pondal, e consecuentemente, pídelle que as teña en conta.
