Galiza Nova convoca "Folga de estudantes" contra a suba das taxas anunciada polo goberno do Estado.
Iría Aboi cualifica "ataque ao ensino público" unha medida que ademais impedirá o acceso á universidade das familias con menos recursos
Santiago, 21 de abril, 2012.A organización xuvenil Galiza Nova ven de anunciar a convocatoria de Folga Estudantil no ensino universitario e medio para o vindeiro xoves 10 de maio contro o anuncio do Goberno de Rajoy de subir as taxas universitarias.
A convocaotria de folga persegue "parar a suba das taxas de matrícula universitaria –de até un 66%-" e que representan un novo ataque ao ensino público.
Neste sentido, Galiza Nova considera que esta é "a maior suba das taxas de matrícula da historia" e asegura que con esta decisión "o PP fai recaer unha parte moi importante do custo dos estudos" sobre as e os estudantes nun momento de graves dificultades económicas para a maioría das familias.
Asemade, Galiza Nova quer denunciar que “o PP pretende rachar co papel do ensino público como igualador social", a medida do Goberno do Estado, manifestan, "dificultará o acceso á educación superior das persoas economicamente máis desfavorecidas”.
Pola súa parte, a Secretaria Xeral de Galiza Nova, Iria Aboi afirmou hoxe que, a suba das taxas é "unha medida socialmente inxusta" que só servirá para agravar a crise a pasos axigantados cara a privatización da universidade pública.
Galiza Nova pide que Feijoo rexeite a medida
Galiza Nova insta ao goberno de Núñez Feijóo a non plegararse ás decisións do seu partido en Madrid e se comprometa cos estudantes galegos a non aplicar esta inxustificada suba das taxas.
A dirección de Galiza Nova indicou que nos vindeiros días se irán dando a coñecer os detalles dunha convocatoria apoiada tamén pola Organización Estudiantil Comités e que está “aberta a todo tipo de apoios”. Galiza Nova deselvolverá unha campaña informativa e de axitación nos centros para “explicar os efecto desta medida e acadar un respaldo masivo, tanto na convocatoria como nas mobilizacións previstas nas 7 cidades galegas”. Ademais, engaden, difundirán a Folga nas redes sociais e a través do twitter co hashtag #paremosasubadastaxas.
