O BNG traslada ao Parlamento as preguntas que o goberno local se nega a contestar sobre a residencia da terceira idade de Cervo
Cervo, 16 de abril de 2011. O BNG cervense segue agardando dende o 29 de marzo a que o goberno municipal responda as preguntas presentadas sobre a existencia ou non de reservas de prazas para residentes do municipio na futura residencia da terceira idade e tampouco si esta vai ter unha xestión pública ou privada. Á vista da situación que incumpre a obriga e os prazos legais de ofrecer información á oposición, trasladan as mesmas preguntas ao Parlamento Galego a través do parlamentar, Fernando Blanco, agardando unha maior dilixencia por parte do goberno galego.
O goberno municipal saberá en que condicións foron cedidos uns terreos que son de tódolos cervenses.
Os nacionalistas critican a actitude pouco democrática do goberno local, que non cumpre a legalidade “case nunca” ao non ofrecer respostas nin ás preguntas nin ás solicitudes de documentación á que temos dereito como membros da corporación, sinala o portavoz nacionalista, Xoán Antón Estúa. E evidente, sinalou o portavoz, “que o goberno municipal ten que coñecer en que condicións cedeu de balde os terreos para este equipamento”, e engade que de non haber estas reservas, “non vai cumprir cos obxectivos que se buscan”.
A privatización dos servizos públicos como adoita facer o PP non permitirá o acceso ao servizo aos potenciais usuarios cervenses.
Estúa mostrouse preocupado pola falta de respostas, “o PP privatiza todo canto toca, xa o fixo coa residencia construída en Viveiro por áreas de goberno nacionalista da Xunta bipartita e non lle vai tremer o pulso para seguir na mesma liña”. Os nacionalistas aseguran que “a xestión privada non permitiría o acceso polo nivel de rendas a moitas persoas e iso e o que o BNG quere impedir.” Neste sentido poñen como exemplo as dúas residencias construídas con diñeiro público durante o goberno de Manuel Fraga en Xove e O Valadouro “que foron privatizadas e deixaron de ser accesíbeis para moita xente”
Pódese descargar abaixo o documento das preguntas parlamentarias
