comarca
Bergantiños

Segue @obloque

Perto dun cento de mozas e mozos participaron nas Xornadas de Verán de Galiza Nova

Asistentes ás XXIII Xornadas de Verán de Galiza Nova no mirador natural do Monte Branco

Perto dun cento de mozas e mozos déronse cita os pasados 23, 24 e 25 de setembro na Comarca de Bergantiños para celebrar as XXIII Xornadas de Galiza Nova. No Concello de Carballo o Alcalde, Evencio Ferrero, xunto co resto de membros da corporación municipal recibiunos para darnos a benvida e “describir a importante trasformación de Carballo dende o goberno municipal”.

Logo dun roteiro sobre Alfredo Brañas acompañados de Xan Fraga chegou a agardada charla sobre a reforma da Constitución pactada polo PP e o PSOE e as súas consecuencias, no Pazo da Cultura de Carballo, coa participación da Secretaria Xeral de Galiza Nova, Iria Aboi, do Alcalde de Carballo, Evencio Ferrero, e do Portavoz Nacional do BNG, Guillerme Vázquez.

Xornadas de Verán de Galiza Nova na recepción no Concello de Carballo

Lugar de paso obrigado nestas Xornadas de Verán foi tamén a localidade de Ponteceso, ata onde as mozas e mozos se achegaron na mañá do sábado. Na vila natal de Eduardo Pondal visitamos a casa do poeta e o val que atravesa o Río Anllóns que tan ben o bardo reflectiu na súa obra. No remate do roteiro, na Casa dos Veciños do Couto, agardábanos o historiador Xoán Carlos Garrido, quen desgranou o pensamento e a obra de Castelao, para, posteriormente, iniciar a subida ao Monte Branco, desde onde as e os asistentes puidemos contemplar as fermosas vistas deste mirador natural.

O día continuou en Cabana de Bergantiños, con diferentes actividades de lecer, desde a práctica do piragüismo, o volei-praia ou o baloncesto ata a visita ao Castro de Borneiro e ao dolmen de Dombate.  Para remate visitamos o espazo natural da Lagoa de Traba, onde a historia medieval  e natural de Galiza foi a protagonista, para posteriormente achegarnos á localidade da Laracha para desfrutar do concerto  do grupo galego Trapallada no Pub D’Antón.

Acto sobre a reforma da Constitución pactada polo PP e o PSOE e as súas consecuencias, no Pazo da Cultura de Carballo, coa participación da Secretaria Xeral de Galiza Nova, Iria Aboi, do Alcalde de Carballo, Evencio Ferrero, e do Portavoz Nacional do BNG, Guillerme Vázquez.

O domingo amenceu soleado para visitar o Museo do Forno do Forte na vila oleira de Buño, en Malpica de Bergantiños. Posteriormente, as e os asistentes desprazámonos ata a Laracha onde Galiza Nova, conxuntamente co BNG, celebrou un acto de homenaxe ás e aos represaliados galegos de 1936. Na praza principal da vila, aínda hoxe en día denomindada “Generalísimo Franco”, contamos coas intervencións de Xosé Manuel Sande, voceiro do BNG na localidade, e de Iria Aboi, Secretaria Xeral de Galiza Nova, que lembraron ás miles de persoas asasinadas e torturadas pola ditadura franquista e esixiron a retirada da simboloxía fascista. O punto final a estas Xornadas puxémolo coa visita a Verdes, no Concello de Coristanco, onde antes de voltar a Compostela as e os asistentes desfrutamos dun xantar á beira do río.

Tres intensos días de convivio e actividades que serviron para debater, analizar e poñer en valor o patrimonio cultural, histórico e natural de Galiza. As Xornadas de Verán volverán o ano que vén noutra comarca e por iso convidamos a todas as mozas e mozos galegos a que vos animedes a asistir.

Acto na Laracha, na Praza que aínda hoxe en día leva por nome "Generalísimo Franco", na memoria das e dos represaliados de 1936 e para esixir a eliminación da simboloxía fascista

 

 

En Ponteceso, ao lado da casa natal de Eduardo Pondal e o Río Anllóns que tan ben retratou o bardo na súa obra

 

 

Na Igrexa do Couto (Ponteceso) onde está soterrada a familia de Eduardo Pondal.

 

---