comarca
Bergantiños

Segue @obloque

O BNG asume o reto de gobernar Carballo en solitario

Constituise a nova corporación de Carballo e elixiuse alcalde a Evencio Ferrero para os vindeiros catro anos.

 

Evencio Ferrero asume a alcaldía e distribúe, de inmediato, as áreas de goberno, para comezar a traballar dende o primeiro momento

Evencio Ferrero, alcalde de Carballo

01/07/2011. Hoxe venres, con un pouco de retraso con respecto ao resto dos concellos do país, constituise a nova corporación de Carballo e elixiuse alcalde para os vindeiros catro anos.

Evencio Ferrero, alcalde de Carballo dende o ano 2003 e candidato do BNG, accede á alcaldía por terceira vez consecutiva e despois de obter os mellores resultados do BNG da súa historia, chegando aos 10 concelleiros/as.

Evencio Ferrero compareceu xa diante dos medios de comunicación para presentar a distribución de competencias no seu novo goberno.

O BNG, con Evencio Ferrero á cabeza, asume por primeira vez o reto de gobernar Carballo en solitario, un mandato que será complexo con tres partidos políticos na oposición, pero coas forzas renovadas despois do importante apoio obtido o pasado 22 de maio.

O BNG púxose a traballar xa dende o minuto un, e inmediatamente despois de tomar posesión como alcalde nun pleno que comezou ás 12 da mañá coa presenza de numeroso público, Evencio Ferrero compareceu xa diante dos medios de comunicación para presentar a distribución de competencias no seu novo goberno.

Milagres Lantes, tenente de alcalde e responsábel da xestión urbanística

Milagres Lantes, que retornou á primeira plana da política local como número 2 da candidatura do BNG nas pasadas eleccións municipais, asumirá un papel central no novo goberno do BNG.

Milagres Lantes

Será a única tenente de alcalde do goberno, e xestionará a área de Planificación e Desenvolvemento Urbanístico, tendo ao seu cargo a redacción do novo Plan Xeral de Ordenación Municipal de Carballo.

Luis Lamas, un referente que se consolida

Luis Lamas, un dos concelleiros con máis traxectoria do BNG de Carballo, onde leva participando varios mandatos do grupo municipal, incluídos os oito últimos como parte do goberno, continuará a xestionar as áreas de Obras, Servizos e Medio Rural.

Belén Lendoiro, un cambio de perfil

Luis Lamas

Belén Lendoiro leva xa tamén oito anos dentro do goberno municipal de Carballo, até o de agora ao cargo da concellaría de Cultura e Normalización Lingüística (no primeiro mandato, tamén con responsabilidades en Ensino).

Este próximo mandato Belén Lendoiro farase cargo de novas áreas de xestión dentro do goberno. A súa área comprenderá Facenda, Patrimonio, Festas e Participación Social, polo que se encargará tanto das contas municipais como da xestión dos centros sociais que colaborou a poñer en marcha no seu paso pola concellaría de Cultura.

Belén Lendoiro

Xosé Regueira, portavoz municipal

Xosé Regueira, que se incorpora por primeira vez ao grupo municipal, asumirá a portavocía do grupo municipal do BNG, e encargarase de todas as áreas de Réxime Interior.

Xosé Regueira

Así, Xosé Regueira terá ao seu cargo os departamentos de Persoal, Protección Civil, Policía Local e Normalización Lingüística.

Mar Eirís suma Educación e Cultura

Ao igual que no primeiro mandato do BNG (2003-2007), Educación e Cultura volverán estar baixo a dirección dunha mesma persoa, neste caso a concelleira Mar Eirís, que até agora se viña ocupando soamente da área de Educación dende a súa entrada no goberno no ano 2007.

Mar Eirís

Marcos Trigo asume Medio Ambiente, Formación e Emprego, ademais de seguir a xestionar o deporte municipal

Marcos Trigo leva catro anos no goberno municipal de Carballo á fronte da concellaría de Deportes, onde fixo unha xestión que fixo rendíbel o Padroado Deportivo Municipal por primeira vez na súa historia.

Marcos Trigo

Nesta nova época de goberno, Marcos Trigo encargarase tamén da área de Medio Ambiente (servizos de saneamento, praias...) e da de Formación e Emprego.

Silvana Castro chega para facerse cargo das políticas de Benestar

Silvana Castro

Silvana Castro, outra das incorporacións ao grupo municipal e a máis nova do novo goberno, farase cargo neste seu primeiro mandato da xestión das áreas de Igualdade, Benestar Social e Mocidade.

Xosé Manuel García Guillín continúa á fronte de Promoción Económica

Xosé Manuel García Guillín

Xosé Manuel García Guillín continuará estes próximo mandato o importante traballo (Fórum, Mercado...) comezado nos seus primeiros catro anos no goberno, e estará novamente á fronte da área de Promoción Económica (que inclúe todo o relativo ao polígono industrial, turismo, comercio, feiras...), ademais de Contratación.

María Carmen Regueira xestionará as políticas de sanidade e para a terceira idade

María Carmen Regueira

María Carmen Regueira, que se incorporou ao goberno municipal xa comezado o anterior mandato, encargarase neste novo período das áreas de Sanidade e Terceira Idade.

 

---