O BNG marca a súa liña en Laxe
27/062011. O BNG de Laxe mantivo nestas pasadas xornadas unha nova reunión co alcalde da localidade, dentro das negociacións para facilitar a gobernabilidade do Concello. A abstención do BNG no pleno de investidura permitiu a reelección do alcalde, pero o BNG non asinou ningún pacto de goberno e quere deixar claras as súas demandas para o novo período político que se abriu tras as eleccións do mes de maio.
As reclamacións do BNG para o próximo pleno, o de organización, buscan garantir un goberno máis transparente e participativo. Así, o BNG demanda, por exemplo, que os plenos teñan lugar os sábados pola mañá (para que poida asistir facilmente toda a veciñanza), e que se creen novas figuras de control e debate, como a Comisión Informativa de Facenda e a Xunta de Portavoces.
O posicionamento do BNG de Laxe e do seu portavoz, Xosé Manuel Pose, para este importante pleno, é o de aprobar para o grupo de goberno dúas dedicacións exclusivas, sempre e cando se cumpran os seguintes criterios mínimos:
· O grupo de goberno presente ao BNG de Laxe un documento no que se especificaren as cantidades dos salarios, tanto líquidas como brutas, coas que serán retribuídas tales dedicacións.
· O grupo de goberno pacte co BNG de Laxe os orzamentos, o POS, o POL ou calquera outro convenio de obras que houber, informándoo coa antelación precisa.
· Se aceptaren por parte do grupo de goberno as seguintes indicacións de cara ao Pleno de organización, en prol da transparencia:
1. Día e periodicidade das sesións plenarias: os sábados, ás 12:00h, unha vez ao mes, agás o mes de agosto.
2. Contestarase as preguntas realizadas polos grupos políticos no seguinte pleno ordinario, limitando o número de preguntas por pleno.
3. Creación da Xunta de portavoces, na que estarán representados todos os grupos políticos con representación no pleno. Reunirase na semana do pleno ou cando o estime oportuno algún dos portavoces.
4. Comisión especial de contas. A representación nela será proporcional ao nº de concelleiras/os de cada grupo (3 PSG-PSOE, 2 PP, 1 IXL e 1 BNG). Reunirase unha vez ao mes.
5. Mesa de contratación con representación de todos os grupos políticos.
6. Garantir as atribucións que lle corresponden por Lei ao Pleno e non delegar ningunha delas na Xunta de Goberno.
7. Acordar as retribucións complementarias dos funcionarios para esta Lexislatura.
8. Poder achegar criterios própios na baremación das seleccións de persoal.
