O BNG da Laracha esixirá ao Partido Popular que cumpra o seu compromiso de construír un novo edificio no Colexio Otero Pedrayo
O Portavoz Municipal do BNG, Xoán Sande, xunto coa Concelleira Carolina Castiñeiras e a Responsábel Local Mónica Castro
Este é o texto íntegro da iniciativa presentada polo BNG para o seu debate no próximo Pleno da Corporación:
Xoán Manoel Sande Muñiz, Portavoz do Grupo Municipal do BNG no Concello da Laracha, ao abeiro do Regulamento de Organización e Funcionamento das Entidades Locais, presenta para o seu debate no vindeiro Pleno Ordinario da Corporación a seguinte MOCIÓN:
O Conselleiro de Educación do PP comprometeuse á construción dun novo edificio na visita propagandística que fixo antes das eleccións municipais
Recentemente, un numeroso grupo de nais e pais de alumnos deste colexio manifestábanse diante da Casa do Concello, reclamando seguridade para os seus fillos e fillas, demandando o cumprimento do compromiso da Consellería de abordar a construción dun novo edificio, e tamén a adopción de medidas para garantir a seguridade dos nenos e nenas, ante as graves deficiencias do actual edificio en aspectos como a instalación eléctrica, por exemplo. Por todo o exposto con anterioridade, o Grupo Municipal do BNG propón ao Pleno da Corporación a adopción do seguinte ACORDO: Instar á Consellería de Educación a que cumpra canto antes o seu compromiso de construír un novo edificio para as aulas de infantil no Colexio Otero Pedrayo da Laracha, así como a cobertura das pistas deportivas. Instar asímesmo á Consellería e ao goberno municipal da Laracha a adoptar, de maneira urxente, as medidas necesarias para garantir a seguridade dos nenos e nenas e persoal do edificio vello do colexio, con respecto á instalación eléctrica do edificio e a calquera outra cuestión que poida supoñer un risco para as persoas.
