Moción solicitando melloras no Colexio Otero Pedrayo da Laracha
Este é o texto íntegro da iniciativa do BNG da Laracha:
Mónica Castro Nogareda, Concelleira do Grupo Municipal do BNG no Concello da Laracha, ao abeiro do Regulamento de Organización e Funcionamento das Entidades Locais, presenta para o seu debate no vindeiro Pleno Ordinario da Corporación a seguinte MOCIÓN:
EXPOSICIÓN DE MOTIVOS:
Desde hai moitos anos vimos demandando algunhas melloras esenciais para o Colexio Otero Pedrayo da Laracha. Unha delas, que o BNG vén demandando practicamente desde a nosa primeira entrada nesta Corporación no ano 1995, é a necesidade de cubrir as pistas deportivas do colexio, algo fundamental para que os rapaces e rapazas poidan practicar deporte durante todo o ano mais tamén para que teñan espazo á hora de poder saír ao recreo cando chove. Esta necesidade non foi ata o de agora atendida por parte da Consellería de Educación, nin tampouco desde o concello se fixo nada por solucionar esta cuestión.
Outra cuestión máis prioritaria aínda é a do edificio onde se imparte as aulas de Infantil, o edificio vello, que está nunhas pésimas condicións e mesmo non reúne as mínimas garantías de seguridade como se vén amosando en cada simulacro que se fai no colexio, que dá como resultado que a maioría dos nenos e mestres quedarían atrapados de producirse un incendio. O propio Sr. Alcalde ten manifestado que é necesaria a construción dun novo edificio.
