Moción sobre o bono social da tarifa eléctrica
Xoán M. Sande Muñiz, Portavoz do Grupo Municipal do BNG da Laracha, ao abeiro do Regulamento de Organización e Funcionamento das Entidades Locais, presenta para o seu debate no vindeiro Pleno Ordinario da Corporación a seguinte MOCIÓN SOBRE O BONO SOCIAL DA TARIFA ELÉCTRICA:
EXPOSICIÓN DE MOTIVOS:
A liberalización operada no sector eléctrico, lonxe de significar unha mellor prsentación do servizo eléctrico nos fogares e abaratar o custe da factura eléctrica para a maioría das economías domésticas, está a ocasionar unha confusión crecente e un incremento no gasto repercutido polo subministro eléctrico á maioría dos consumidores.
A constatación do fracaso da aplicación da política de libre competencia nun servizo esencial para toda a comunidade como o subministro de enerxía eléctrica, onde ademáis o abano de empresas comercializadoras redúcese a cinco, ponse de manifesto mesmo na recente normativa reguladora sobre a materia, como é ocaso da creación do denominado "bono social", consistente nunha bonificación na factura eléctrica por unha contía igual á diferenza entre o valor da tarifa de último recurso e unha tarifa reducida, é unha bonificación na factura por unha contía igual á diferencia entre o valor da tarifa de último recurso e un valor de referencia ou tarifa reducida co que se pretende corrixir a importante repercusión económica que o novo sistema de tarifas ocasiona na economía da maioría dos consumidores domésticos.
Malia que no limiar do Real Decreeto Lei 6/2009, do 30 de abril, se expresa claramente "...que se require a posta en marcha de forma inminente dun bono social...", non é ata case dous meses despois cando se publica a Resolución do 26 de xuño de 2009, da Secretaría de Estado de Enerxía, onde se determina o procedemento de posta en marcha do bono social, e se concretan as persoas beneficiarias da medida: as titulares dun punto de subministro na súa vivenda habitual de 60 ou máis anos de idade que acrediten ser pensionistas do Sistema da Seguridade Social que perciban as contías mínimas, as que acrediten ser familias numerosas, as que acrediten formar parte dunha unidade familiar con todos os seus membros en idade de traballar en situación de desemprego e as que teñan contratada unha potencia menor de 3 kv.
Estos potenciais beneficiarios, ademáis da demora na publicación e polo tanto a posta en marcha efectiva do bono social, están a sufrir atrancos inxustificados, como incumprimentos das empresas distribuidoras e comercializadoras de enerxía eléctrica no relativo á publicidade do procedemento e o ofrecemento de información exhaustiva, a imposibilidade dunha atención presencial dado o escaso número de empresas comercializadoras existentes, ou mesmo a necesidade de achegar múltiple documentación acreditativa de diversos organismos e administracións públicas, entre eles o Concello.
Por todo o exposto con anterioridade, o Grupo Municipal do BNG propón á Corporación en Pleno a adopción dos seguintes
ACORDOS:
1. Instar ao Ministrerio de Industria, Turismo e Comercio e á Comisión Nacional de Enerxía a adoptaren as medidas necesarias que garantan a extensión a todos os beneficiarios do bono social, e a súa aplicación efectiva nos prazos establecidos pola normativa vixente.
2. Instar ás Consellerías de Traballo e Benestar, e de Economía e Industria, e ao Instituto Galego de Consumo a por en marcha, de xeito urxente, Planos de Comunicación, Información e Asesoramento sobre as últimas modificacións no sistema de tarifas eléctricas e da aplicación do bono social, orientadas tanto á poboación en xeral como especificamente aos potenciais beneficiarios.
3. Ofrecer un servizo de información, asesoramento e colaboración na tramitación da solicitude do bono social, por parte do concello da Laracha, onde se facilite ademáis dun xeito áxil toda a documentación acreditativa que o beneficiario deba obter do concello.
A Laracha, 27 de agosto de 2009
Asdo.: Xoán M. Sande Muñiz, Portavoz do Grupo Municipal do BNG
